Maani Nordbomi eqqumiitsuliat nuannarisaraagut – aamma eqqumiitsuliat tikeraartugut najukkatsinnilu innutaasut taakkuninnga avitseqatigerusuppagut.

Vandsøvejimi saaffiginnittarfitsinnut iseruit taava nattoralik qalipagarujussuaq siumussavat, Kalaallit Nunaanni ukiuunerani pinngortitami timmisoq. Qalipagaq eqqumiitsuliortumit  Miki Jacobsenimit suliaavoq, 2021-imi Nordbop allilerneqarneranut annertuumut tunngatillugu qalipagaraa.

Miki Jacobseni qalipakkani pillugu oqaluttuarpoq:

- Nunarsuaq pinnersorsuaq nuannerluinnartoq inuuffigisarput aallaavigaara. Qalipagaq piviusumut uiggiussaavoq aammalu ilutigalugu oqaluttuatoqqat silarsuaannut takorluukkanullu tunngavoq . Naak, uanga maani Kalaallit Nunaanni inunngorsimagaluarlunga, ulloq manna tikillugu pinngortitaq alutoriuaannarpara. Aamma oqaluttuatoqaatitta silarsuaat assut soqutigisaraakka uanilu saaffiginnittarfimmi qalipagaq pillugu taalliaralugu pitsiorpoq. Nattoralimmik angisoorsuarmik assiliartaqarpoq aamma taanna oqaluttuatoqqami "nuannaarnerup tunissutaa"-ni soorlu aamma takutinneqartoq, nattoralik taanna immikkut piginnaanilik, inuit uummammi tillerneranik katersuutsittarai, taamaalilluni inuit qanittumiit ungasissumiillu katersuutsittarpai nuannaarnerup tunissutaa paasiniaaffigalugu.

Miki Jacobsen, 1965-imi Paamiuni inunngorpoq Sisimiuni peroriartorpoq, qalipakkap saniatigut aamma Hotel Nordbomi init nutaat 18-it pinnersarpai. Jacobsen Nuummi Eqqumiitsuliornermik Ilinnniarfimmi ilinniagaqartuuvoq aamma Skolen for Brugskunst-imi.

Aamma silataani malugineqarsinnaavoq Nordbop eqqumiitsulianik nuannarisaqarnera. Eqqumiitsuliat pingaarnerit granit-imik ilusilersugaapput marluusut tassaapput qiperuisartup Jens Erik Kjeldsenip suliai  – TV-kkut allakaatitassiami nangeqattaartumi  ilisimaneqarluartuumiippoq Peitersen og Nordvestpassagen-imi. Uani pineqarpoq Tunersuit, taanna Hotel Nordbop saavani Vandsøvejimiippoq aamma Inequnaaluup Sinnattugaa, illoqarfiup qeqqaniittumi Nordbomi Samuel Kleinschmidtip Aqqutaani. Qiperukkat taakku marluusut qulaarneqarput Nordbop ukiuni 15-ini nalliuttorsiornerani 2013-imi.

Tunersuit (tassa qajaq tamaat naallugu tippik atortoq taama taaguuteqarpoq), kisiannili aamma oqaluttuatoqqani Dorset-kulturianneersuuvoq tassani takuneqarsinnaavoq umimmammut angissusissaa piviusoq tamaat naapertorlugu angissusilikkat tassungalu hiistersoq (umimmammut).

- Ujarassuaq  Aasianni sannavinni suliarivara - pilersaarutigalugulu, umimmak angissusivimmitut angissusiligaq. Kisianni suliarinerani qatigaani hiistersoq pilersippara, tamannalu tusaatissatut tiguara. Ujarassuup tunuatungaa attornagu suliara naammassivara tassuuna ilusilersukkap sumik aallaaveqarnera takutikkumallugu, Jens Erik Kjeldsen oqaluttuarpoq.

- Umimmak Kalaallit Nunaanni uumasut annerit ilagaat taanna takussutissaavoq nunatta naakkittaatsuuneranut alutornassusersuanullu. Tassani inuk uummasinnaavoq aatsaat pinngortitaq ataasioqatigalugu inuuguni – taamaattumik taassuma ilusip toqqarneqarnera pissusissamisuuginnarpoq, kalaalerpaluttumik qiperugaliassamik toqqaanermi. Tunersuit ujarattaa Aasianni ujaqqerivimmeersuuvoq. Tunersuit angutit angissusaannut innersuussivoq, Dorsetinit nunap ilorpasissortaani inuusunut takussutissaalluni, taakku kalaallit oqaluttuatoqaanni naammattuugassaajuartarput. Dorset-it Kalaallit Nunaanni inuusimapput ukioq 800 Kristusip inunngornerata siornagut ukioq 1300 tikillugu.

Inequnaaluup Sinnattugaa (Inequnaaluks drøm)-imi takutinneqarpoq kalaallit oqaluttualiaat aamma taama taaguuserneqartoq. Qiperukkami takuneqarsinnaavoq arfeq, nalinginnaasumik angissusilik, arnaq qitornaalu. Qiperugaq aamma ujaqqap angissusaanit aallaaveqarluni pinngorpoq, taama oqaluttuarpoq Jens Erik Kjeldsen:

- Takulerpara arfeq, qerlertoruulluni ujaqqamit anillanniarsarisoq kisiannili malinnaapput arnaq meerarlu. Meeraq arnarlu qunusuitsut,  "avannaamiutut" inuunermik sungiussisimasut – qallunaatsiatut.

Inequnaalummik oqaluttuatoqaq Jens Erik Kjeldsenip paasinninnera malillugu oqaluttuatoqaavoq kalaallit kultureqarnikkut oqaluttuatoqaasa pitsaanersaat. (oqaluttuatoqaq ugguuna atuaruk).

Vandsøvej-imi inini pisoqaanerusuni Nuullu qeqqani Nordbo-miipput assilissat 300-t missaat kalaallimit eqqumiitsuliortumit Michael Simonsenimit taassuma aamma init ataatsimoorfiusartut qalipakkaminik kusassarpai, toqqaannartumik iikkanut qalipakkanik.